Арассыыйаҕа Аҕа дойдуну Көмүскээччи, Саха сиригэр Ийэ дойдуну көмүскээччи сылыгар бэлиэтэнэр Улуу Кыайыы 80 сылын көрсө Быракаан нэһилиэгэр араас тэрээһиннэр буолан аастылар. Ол курдук Ыам ыйын 8 күнүгэр Нэһилиэктэн Аҕа дойдуларын көмүскүү барбыт биир дойдулаахтарбытыгар аналлаах «Хахсык» сиргэ турар өйдөбүнньүгү оскуола оҕолоро, учууталлар,нэһилиэк олохтоохторо баран кырааскалаан, сөргүтэн кэлбиппит. Ыам ыйын 9 күнүгэр нэһилиэгинэн тахсан параадтаатыбыт. Кыайыы скверыгар митинг буолла. Нэһилиэк кырдьаҕаһыгар,сэрии сылын оҕотугар Яковлев Егор Герасимовичка Ил дархан эҕэрдэ суругун, бэлэҕин нэһилиэк баһылыгын солбуйааччыта Цыпандина А.Н. туттарда. Ону таһынан Оскуола коллектива СВО кыттыылааҕын дьиэ кэргэнигэр продукта наборун туттарда. ЖКХ,МПЧ коллективтара Чечня сэриитин ветераныгар Кочнев С.Ф продукта наборун бэлэх ууннулар. Митинг кэннэ эҕэрдэ концерт буолла. Оскуола коллектива буһарбыт саллаат хааһытын сиэтибит. Нэһилиэк дьоно «Окна Победы» , «Свеча памяти» Бүтүн Арассыыйатааҕы аахсыйаларга кыттыста. Ити курдук Кыайыы 80 сылын нэһилиэк олохтоохторо көхтөөхтүк кыттан бэлиэтээтилэр.
