Семен Титович Руфов     Поэзия ыалдьыттаата.

Соҕотохпун, куруспун-

Суоҕа үөрүү дууһабар…

Арай онтон эмискэ

Аан тэлэччи арыллар!

Киирэн кэллэ, арылыйан,

Кэрэ аанньал мин хоспор –

Үөрүү – көтүү чаҕылыйан

Өҥөс гынна олохпор.

Ону кытта кутулунна

Уоттаах сааскы сардаҥа –

Кыламанын ахсыттан

Кыыһар имэҥ утаҕа!

Күрэҥ дьиэбин тириэрэннэр

Күөх лабаалар чэлгийдилэр,

Тоҥ тымырбын ириэрэннэр

Итии тыаллар илгийдилэр.

Сэттэ өҥнөөх кустук курдук

Сиэдэрэй чыычаах ыллаата,

Тунал хаардаах хочо курдук

Тулам барыта сырдаата…

Туойуох санаам көптө дии,

Тугун бэрдэй?! Ити аата –

Мин дууһабар мичээрдии

Поэзия ыалдьыттаата!

                                         Хоһоон диэн…

Хоһоон диэн дьалкыллар бааллаах дириҥ далай…

Эдэр тойуксут онно умсан

Эрэлин көрдүү эрдинэ уймуур,

Эрэйи көрөн, муҥу тыыран,

Этигэн тылын эрчийэ оонньуур.

Хоһоон диэн курулуу тохтор таастаах хайа…

Сааһырбыт поэт онно ыттан

Санаата оонньоон уоҕурар, кэҥиир.

Саҥа күҥҥэ баҕатын анаан

Саһарҕа кыыһан тахсарын кэтиир.

Хоһоон диэн куугунуур тыаллаах хонуу куйаар…

Кырдьаҕас лирик онно сылдьан

Кый ыраах хаалбыт эдэрин саныыр –

Кытта кырдьыбыт лиратын ылан

Кылларын тардан ыллата сатыыр.