Саха Сиригэр үлэ сылын чэрчитинэн. Быракаан нэһилиэгэ 1970 – 80 сылларга.

  1968с.дойдуга тыа хаһаайыстыбатын реформатын чэрчитинэн колхозтар бөдөҥ совхозтарга холбоммуттара. Быракаан учаастага Исидор Барахов аатынан совхоз Өргүөттээҕи отделениятын иккис нүөмэрдээх биригээдэ буолбута. 1977с. «Исидор Барахов»  совхозтан араҕан салгыы «Карл Маркс» аатынан отделенияҕа киин уһаайбаланан Кэнтик, Үөдүгэй, Өргүөт,Быракаан, Туобуйа отделениялара холбоһон  “Үөдүгэй ” совхоз тэриллибитэ.

   Быракаан нэһилиэгэ ынах сүөһүнү эккэ анаан иитэрэ. Хойукка дылы субай сүөһүнү, ыанньыгы учаастактарга көрөллөрө. Ньирэй көрөөччүлэринэн мэлдьи Иванова Мотрена Спиридоновна, Алексеева Мария Степановна, Саввинова Мария Денисовна,Николаева Мария Тихоновна үлэлииллэрэ.

   Иванова Мотрена Спиридоновна 100 ньирэйгэ тиийэ 100% тыыннаах көрөрө. Сайыҥҥы привестэрин 110 – 120кг тириэрдэллэрэ. Ыччат сүөһүнү утумнаахтык улаатыннарыыннан дьарыктаммыттара, элбэх опыты мунньуммуттара. Утумнаах үлэ түмүгүнэн кыстык кэмигэр бороону 130-150кг улаатыннараллара. 1971 – 74сс. республикаҕа ыҥырыы таһааран үлэлээбиттэрэ. Быракааҥҥа 1974с.ССКП райкомун 1 секретара Николаев М.Е. ыччат сүөһүнү төлөһүтүүгэ республиканскай сүбэ мунньаҕы тэрийэн, Саха сирин элбэх оройуоннарыттан үгүс  ыалдьыт кэлэн, опыт атастаспыттара, сүбэлэспиттэрэ. Элбэх сыллаах үлэлэрин ситиһиилэринэн Алексеева Мария Степановна “Үлэ Кыһыл Знамята” , Иванова Мотрена Спиридоновна”Бочуот Знага”орденнарынан наҕараадаламмыттара. Яковлев Савва Игнатьевич “Саха Республикатын тыатын хаһаайыстыбатын үтүөлээх үлэһитэ” аат иҥэриллибитэ. Чуручанов Иннокентий Иудовичка” Килбиэннээх үлэтин Иһин” медалынан наҕараадаламмыттара.  Ити курдук Быракааммыт дьоно – сэргэтэ дьоһуннаахтык үлэлээннэр үрдүк ситиһиилэммиттэрэ. Кинилэринэн биһиги киэн туттабыт,үлэлиибит – хамсыыбыт.

                 Олохтоох библиотека  вед.библиотекара Баянаева М.Н.