БЫРАКАНСКАЯ СЕЛЬСКАЯ БИБЛИОТЕКА

Үлэ сылынан бэргэн этиилэр.

                                         Үлэ киһини киэргэтэр.  Бэргэн этиилэр.

Үгүс үчүгэйгэ көҕүйбэккэ

Үлэлээтэххинэ үссэниэҥ

Алыс аймааһыҥҥа аралдьыйбакка

Аһыыргын санаатаххына абыраныаҥ,

Кэлтэччи киһиэхэ кэнтэйбэккэ

Кэскилгин тэриннэххинэ

Киһи – хара буолуоҥ.      (Алампа)

Доҕоруом,дьол диэни билэҕин,

Долгуйар тыыннаах сүрэххинэн,

Үрүлүйбүт үлүскэн үлэҕин –

Үчүгэй диэн дьон үөрдэҕинэ.      (Семен Данилов)

Күн анныгар үлэтэ суох туох да айыллыбат, оҥоһуллубат,туох баар киһиэхэ, тыыннаахха сыһыаннаах ийэтэ – үлэ.      (Бүөтүр Тобуруокап)

    Үлэһит киһи үлэлээтэҕинэ эрэ дуоһуйар, үөрэр – көтөр, дьоллонор. Үлэ киһини кынаттыыр, халлааҥҥа өрө көтөҕөр.   (Иван Данилов)

   Үлэ киһититтэн ордук чиэстээх, ытыктабыллаах бу күн анныгар ким баар буолуой? Үлэ үөрүүтүттэн ордук үрдүк, ыраас үөрүү туох баарый?

                                                                 (Иван Гоголев – Кындыл)

Үлэ көҕө диэн бу улуу күүс.                  (М.Е.Николаев).

Киһи олох олорорун устата үлэлиир

Тус бэйэтигэр,тулалыыр эйгэтигэр,

Үлэ иилии эргийэр эн, күҥҥүн,

Үлэ, үлэ эрэ арыйар эн,кимҥин.

Үлэнэн оҥоһуллар уйгу,

Үлэнэн салаллар саргы.      (Саргы Куо)

Үлэни саҕалыах эрэ иннинэ ыарахан. Үлэлээн бардахха,киһи үлэ иһигэр киирэн, улам сыстан, таттаран барар, кыаллыа да суох курдук кыаллан иһээччи.      (Василий Яковлев – Далан)

Үлэ баар – киһини олоҕун дьоллооччу,

Үтүөтүн норуокка,номоххо холбооччу…   (Алексей Бродников)