Зоя Николаевна Алексеева туһунан ахтыы.
Дьуона аҕа ууһуттан төрүттээх Алексеев Ньукулай (Эгэрэ) Мээрикээттэр аҕа уустарын кыыһын Сөдүөрэни ойох ылан уончата төрөөн 6 оҕолонон “Кээҥкирэҕэ” ыал буолан олорбуттара. Кинилэр Сэбиэскэй былаас олохтоноругар бастакыннан колхуос чилиэннэринэн киирбиттэр. Ийэм Алексеева Зоя Николаевна ортоку оҕонон 1932с.төрөөбүтэ. сэрии кэмин оҕолорун аас – туор олохторун этинэн – хаанынан билбит оҕоннон буолар. Ийэлээх аҕата оҕолорун киэҥ көҕүстээх, тулуурдаах, дьулуурдаах буоларга үөрэтэн, такайан киһи оҥортообуттар. Ийэбит Зоя Николаевна Быракааннааҕы 4 кылаастаах оскуоланы бүтэрэн ийэтигэр көмөлөһөөрү салгыы үөрэнэ барбакка колхуоска ыанньыксытынан үлэлии киирэр. Ол сылдьан Намтан субан сүөһүнү үүрсэн кэлбит уолу көрсөн, сүрэҕинэн сөбүлээн Былачаев Иван Яковлевичка эргэ тахсан оҕо төрөтөн иллээхтик – эйэлээхтик олорбуттара. Биһиги ийэбит, аҕабыт сымнаҕас майгылаах буолан буолуо, куруук биһи дьиэбит ойоҕоһугар кыһыл таҥаска “Агитзона” диэн сурук суруллан турар буолара. Дьиэбит иһэ иккис хонтуора курдук буолааччы. Ол киирбит дьоҥҥо ийэм булгуччу даҕаны саха сиэринэн хойуу үүттээх чэйин туппутунан сылдьара. Ийэбит кыыһыран тымта сылдьарын, кими эмэ мөҥүттэрин хаһан да көрбөтөхпүт. Куруук үлэ үөһүгэр колхуос, совхоз бастыҥ ыанньыксыта, сайылык бастыҥ повара буолан пенсияҕа тахсыар дылы үлэлээбитэ. Сайынын «Эйит» сайылыгар сайылыырбыт. Ийэбит ынахтарын ыан баран сайылык дьонугар килиэп буһарара, ас астыыра. Киэһэ аайы дьиэ иһинээҕи дьоҥҥо кинигэ ааҕар идэлээҕэ. Бары чуумпуран истэ сатаан утуйан хааларбыт. Үлэтин быыһыгар тыаҕа тахсан отонноон киирэрэ. Билигин ахтан санаан кэллэххэ кини девиһэ – «Киһи суобастаах буолуохтаах», – диэн тылынан биһигини барыбытын ииппит эбит. Ол тылларын биһиги оҕолоро сиэннэригэр тиэрдэн улаатыннартаатыбыт дии саныыбыт. Биһиги ийэбит Зоя Николаевна эйэҕэс майгытын билиҥҥээҥҥэ дылы ахтар, саныыр дьоннор баалларыттан биһиги киэн туттабыт. Оҕолорбут оҕолоро эбээлэрин сырдык, ыраас санаатын сүтэрбэккэ илдьэ сылдьыахтара диэн эрэнэбит. Олохпут орто омурҕаныгар тиийэн олорон санаатахпытына, күн – күбэй ийэбит барахсан, майгылаах үтүөтэ, сырдыгынан эрэ сыдьаайа сылдьар мичээрдээх киһи эбит. Ыал ийэтинэн диэн тыллар оруобуна биһиги ийэбитигэр анаммыттар эбит. Туттуулаах түргэнэ, ырааһа,уус тарбахтаах иистэнньэҥ бэрдэ, элбэх тотоойу астаах – үөллээх далбар хотун эбит. Олоххо тардыһыыта олус күүстээх, эр санаалаах, мындыр хотун- хаан дьахтар этэ. Барахсан , кытаанах санаалаах, олох олоруута дьулуурдаах буолан оҕо эрдэҕиттэн олох очурдарын,моһоллорун туораан ийэ, эбээ буолар үрдүк аакка тиксибитэ. Бэйэтэ ис – иһиттэн аристократка, саҥаны билэргэ дьулуурдаах, үтүөнү эрэ ыраҥалыыра, кэрэни эрэ түстүүрэ. Ийэбит барахсан бэйэтин үтүө холобурунан иитэн олох киэҥ аартыгар таһаартаабыта.
Ахтыыны суруйдулар: Зоя Николаевна кыргыттара Розалия Ивановна уонна Саргылана Ивановна.
