Ахтыы.
Мин ийэлэрим
Мин төрөппүт ийэм Алексеева Александра Ксенофонтовна 1938 сыллаахха муус устар ыйга Быракаантан киирэн оройуон роддомугар миигин оҕоломмут. Оҕо сааһым Быракаанҥа Илин Ырайга, Арҕаа Ырайга, Иэриҥээҕэ, Чаалбыкыга биир бириэмэҕэ Хочот, Одуҥда диэн үрэх баһа сирдэргэ ааспыта. Оо, көһөн да биэрэрбит. Суол – иис билиҥҥи курдук буолуо дуо, омоон,арыт ыллык бырыы да бадараан буолара. Көһөр көлөлөрбүт, туркулаах таба, ыҥыырдаах таба, оҕус сыарҕата, бэркэ табылыннахха ыҥыырдаах ат. Ийэм кыра сылдьан ыарыһах баҕайы үһү, ону эһэм өлөөрү сытан, улахан кыыһыгар Аннаҕа балтыгын бэйэҕэр ылан иит диэн кэриэһин эппит. Ол иннигэр Анна уол оҕоломмута туораабыт. Онон эдьиийэ Анна Оногосова балтын ылан бэйэтин оҕотун курдук ииппит. Кэргэн да тахсан баран эдьиийиттэн арахпатах. Биһиги үс бииргэ төрөөбүттэрбит. Быраатым Владимир, балтым Мария. Быраатым Владимир төрөөбүтүгэр эдьиийэ кэргэнинээн балтын уонна күтүөтүн кытта сүбэлэһэн миигин эдьиийим Анна, күтүөм Иван ииттэ ылбыттар. Ол да кэннэ син биир бииргэ бары суулаһан олорбуттар. Эдьиийим – ийэм Анна биһигини көрөн – харайан ийэм Александра колхоз төһүү үлэһитэ буоллаҕа дии. Дьиэ кэргэн таҥаһын – сабын, аһын – үөлүн барытын Анна – ийэм тутан олорбута. Оттон ийэм Александра,аҕам Глеб, күтүөм Иван – аҕам үлэттэн бокуойа суох буолааччылар. Ийэм Александра кыһын фермаҕа дояркалыыр, онно Анна – ийэм көмөлөһөр, хотоҥҥо тэҥҥэ сылдьыһар буолара. Сайын от үлэтигэр, саас ыһыы бириэмэтигэр дьоммутун көрөрбүт да ахсааннаах буолара. Биһиги Анна ийэбинээн олорорбут. Быраатым ыалдьан ону ыарыылыы киирэн оройуонҥа 36 нүөмэрдээх аптекаҕа үлэҕэ киирбитим. Кэргэн тахсыбытым, быраатым үтүөрэн РПС-ка үлэҕэ киирбитэ. Ийэбин Аннаны көһөрөн киллэрбитим. Дьонум Быракаанҥа хаалбыттара. Ийэм Александра улаханнык ыалдьан Якутскайга операцияҕа барбыта, аҕабын Глебы оройуонҥа көһөрөн киллэрбитим. Ийэм Александра эмтэнэн кэлтин кэннэ Владимир ийэлээх аҕатын бэйэтигэр көһөрөн ылбыта. Аҕас балыс дьэ арахсан, икки оҕолорунан тус – туспа ыал дьэ буолбуттара. Онон мин икки ийэлээх дьоллоох киһибин, кинилэр көмө – ньыма буолан соҕотоҕун да хаалларбын алта оҕобун иитэн үөрэтэн үлэһит, ыал дьон оҥортообутум. Онон ийэлэрбэр махталым муҥура суох улахан.
Ахтыыны суруйда икки ийэ кыыстара Сусанна Кузьмина. 09.06.2021с.
